Санхүүгийн бус бизнес, мэргэжлийн үйлчилгээ үзүүлэгчид  (СББМҮҮ)-ийн мөнгө угаах болон терроризмыг санхүүжүүлэхтэй тэмцэх эмзэг байдлын үнэлгээний хүрээнд байгуулагдсан Модуль -7 дэд ажлын хэсгийн анхны хурал 2025 оны 4 дүгээр сарын 18-ны өдөр Монголбанкны байранд зохион байгуулагдлаа.

Энэхүү модуль нь дараах СББМҮҮ-ийн үйл ажиллагаа явуулж байгаа салбарын мөнгө угаахад өртөх эмзэг байдлын эрсдэлийн үнэлгээг хийж гүйцэтгэж байна. Үүнд:

1. Үл хөдлөх эд хөрөнгө зуучлалын байгууллага
2. Үнэт металл, үнэт чулууны, эсхүл тэдгээрээр хийсэн эдлэлийн арилжаа эрхлэгч
3. Нягтлан бодох бүртгэлийн болон санхүүгийн зөвлөх үйлчилгээ үзүүлэгч
4. Хуульчийн мэргэжлийн үйл ажиллагаа эрхлэгч
5. Нотариатч

Үнэлгээг үр дүнтэй хэрэгжүүлэх үүднээс нийт ажлын хэсгийн гишүүдийн ажлын чиг үүргийг харгалзан үзэж Дэд ажлын хэсгийн гишүүдийг гурван багт хувиарлан ажиллахаар шийдвэрлэлээ.

Хурлын үеэр Санхүүгийн мэдээллийн албанаас Үндэсний эрсдэлийн үнэлгээ болон Дэлхийн банкны аргачлалын талаар танилцуулга хийж мөн дэд ажлын хэсгийн багийн бүрэлдэхүүн болон ажлын төлөвлөгөөг баталлаа. Түүнчлэн хурлаар баг тус бүр дата мэдээлэл цуглуулах ажлын зохион байгуулалтаа хэлэлцэв.